Plattdüütsch annerwegens
Vandagen köönt wi een Bidrag van een annern Butenoostfresen lesen.
Dit Gedicht stammt af van Rudolf Heyer van den Vereen "Eala frya Fresena“.
in Wilhelmshaben un is 1971 druckt wurn.

Wat is dat för 'ne Tiet
(Oostfreesk Platt)
Wat is dat för'n Tiet, wenn de Duffert weer röppt,
wenn de Rogge greit, un over de Heid
de grote, bruun Tüüt un de Kullerhahn löppt!
Wat is dat för'n Tiet, wenn de Appelboom bleiht,
wenn de Lucht so lau, de Hemel so blau,
so hoog un so wiet, un de Leverke fleit!
Wat is dat för'n Tiet, wenn de Stoorke weer wohnt
up Nabers oll Schüür, un achter de Müür
de lüttje, sööt Griet hör'n Janhinnerk nu soont!
Wat is dat för'n Tiet!

Wat is dat för 'ne Tiet
(Olinborger Platt)
Wat is dat för 'ne Tiet, wenn de Duffert weer roppt,
wenn de Rogg waßt un öwer de Heid'
de grode, brune Bekassin un de Barkhahn loopt !
Wat is dat för 'ne Tiet, wenn de Appelboom bleuht,
wenn de Lucht so lau, de Hewen so blau
so hooch un so wiet, un de Lauerk fleut!
Wat is dat för 'ne Tiet, wenn de Adebaar woller wahnt
up Nabers ole Schüür, un achter de Müür
de lüttje ,leefelk Greet ehren Jannhinnerk 'n Söten gifft!
Wat is dat för 'ne Tiet!
 

Rom up eegen Fuust.

Mien Fro un ik hebbt dacht, dat so`n Krüüzfahrt mit`n Schipp wat för öllere Lü weer.
Dar höört wi beid, wo wi nu an`e Sämzig gaht, ja ok ok al to. Darwägen hebbt wi in`n Oktoberrmaand verleden Jahr so`n Fahrt mitmaakt. Dat Schipp weer gewaltig: 235 Meter lang, 14 Stockwark hooch. Dat geev een Theater för 600 Lü, „Swimmingpools“,“Fitnes“-Ruum un noch vääl mehr „Komfort“.
Wat geev`t nich allns to futtern an dat Fröhstücks- un Avendbuffet! Koffi un Koken rund um`e Klock, un allns weer in den Reisepries mit binnen!
Bedeent wurr man van all Sieden, mehrstiets Frolü van`e Philippinen, de so wat fiev bet söben Wöör düütsch snacken kunnen: Bitte … danke … noch ein Bier? Hat`s Gesmeckt?
Fründlichkeit strahl ut är Ogen.
Nich to vergäten weer de „Späälbank“, een „Boutique“ un us „exclusive“ Butenkabin, wor man ja fein rutkieken kunn, anners as bi`n Binnenkabin.
De Utgangshaven weer Palma de Mallorca, wor de Krüüzfahrt na sess Daag ok wedder ennen dee. Dat Schipp legg an verscheeden Havens an. Ok in Civitavecchia un Livorno in Italien, Cannes in Frankriek un Barcelona in Spanien.
Van de enkelden Haven wurrn Utflöög anba`en. So hebbt wi van Livorno een Bus-Tuur mitmaakt na Florenz .Van Cititavecchio ut wulln wi Rom up eegen Fuust ankieken.
Man dat leep anners af as wi us dat vörstellt hebbt.
Mit paar anner Gäst sünd wi na`n Bahnhoff henzuckelt, de so`n halvstunnstiet van`n Schippsanlegger weg weer. Klock halv ölben föhr de Tog na Rom af. Een knappe Stunn duur de Fahrt. Up`n Bahnhoff kregen wi “Garantie“, dat wi Klock dree woller trüggfahrn kunnen.
De Garantie weer wichtig wägen den Streik van de Isenbahners in Italien.
In`e Stadt hebbt wi us den weltbekannten „Trevibrunnen“ ankeken. Gewaltige Skulpturen sünd in`n Fels rinslaan. Mit är Fööt staht se in`t Brunnenwater. Dar smitt man Geld rin un kann sik dar wat bi wünschen.
De Tiet weer knapp, so hebbt wi den Vatikan blot van wiether sehn. Dat weer ok nich slimm, de Papst holl um disse Tiet ahnhen sien Middagsslaap.
Ja, de Tiet! Man weer bang, dat wi den eenzigen Tog nich mehr kriegen deen. Darwägen man gau woller trügg na`n Bahnhoff, wor wi up Tiet ankemen.
Man date erste Överraschen weer dr: De Affahrtstiet wurr up Klock fiev verleggt!
Naja; dat weer jüüst noch froh noog up`t Schipp to kamen, wat Klock acht s`avends afleggen schull. Töven dee`t nich.
Dat schull noch leeger kamen: Nee`e Affahrtstiet 18.46 ! Schull dat langen?
De Taxifahrers harrn den Bahnkuddelmuddel ok spitzkregen un den Pries van 120 up 180 Euro rupsett. Gottloff kunnen wi mit us Koppel van söbentein Lü „per handy“ Kontakt to usen Schippskaptein kriegen. He versprook, bet Klock halvig nägen to töven – man kien Minut länger!
Dree un dreeviddel Stunnen töven, de Klos all afslaten un denn nich wäten, köönt wi`t noch rieten, dat hett us möer maakt. Man an`t Enn is allns noch mal mit`n Glück togahn.
De anseggt Tog föhr tiedig af, in`n Drafft van`n Bahnhoff na`n Haven, un wi weern kort na Klock acht an Bord!
De 1 200 Passagiere harr de Kaptein us Malöör al kunnig maakt. Man wägen de hogen Havengebühren, un för twee of dree Lü harr he nich mehr länger as`n viddel Stünn töven drufft. Bi sien Anspraak an`n leßden Dag hett he denn noch mal wahrschaut, nienich wat sülben to unnernehmen, sunnerlik wenn de Isenbahn in Italien streiken deit.
För mien Fro un mi weer dat förwiß nich de leßde Schippsreis, man een Landgang up eegen Fuust … naja, wat schall ik dar noch groot verklaarn?
 

Bericht över`n Tuur na Südengland un Cornwall Juli-Maans 2006.
(Utschnitt).

Wi sünd jo veel dör de Gegend föhrt, un wat hefft wi sehn? Moi`e Heckenlandschop un Schaap, ümmer wedder Schaap. Wo weern de Keuh un Beester? No de Muul-un Klauensüük un BSE-Krise hefft se se afmurkst, eenfach dootmaakt. Eerst bilütten fangt se wedder mit Veehrucht an.

Wat dat dor ok nich gifft, sünd Radfohrers, blot af un an mol een, de sick freun kunn, wenn an de Siet von de Straat een smalen Fohrradweg weer.

Wat dat aver unmunnig veel gifft, dat sünd Schosteens, baven up`t Dack een Schosteen neven den annern. Wo kummt dat? wulln wi wäten. De Lüe hefft all Avens harrt, bold in jedet Zimmer een un för jeden Aven geev dat een Schosteen. De Lüe hefft mit Köhlen heizt, dat hett rökert, un de swarte Qualm is an de Hüüs behangen bleven. So sünd se swart wurrn.
Nu is dat aver all anners, de nee`n Hüüs hefft Heizung mit Gas oder Öl un blot noch een Schosteen, un sünd ok goot in Farv.

Aver de Gardinen, wenn överhaupt, denn hangt de man eenfach so vör`t Finster, un kien Blomen op de Fensterbank. In ganz England sühst du kien Blomen op de Fensterbank stahn

För us undenkbor, kannst mit Düütschland nich verglieken.
In England gifft dat jo veel Adelsfamilien, un ehr Hobby is de Jagd. Se dröfft siet lest Johr kien Fuchsjagd mehr maken, war ehr bannig stuur fallt. Of dat ok Adlige sünd, oder of sick ok eenfache Lüe bi Kricket vergnögen köönt, hefft wi nich rutfunnen. Op alle Fälle musst du dorför antrucken ween un twars in Witt, Hemd, Büx un Schoh, allns witt. Bannig Spaaß maken mutt dat, denn wi hefft faken Gruppen sehn, de sick bi dat Speel vergnögen deen.
Golfplätze un –speelers geev dat natürlich ok, aver dat is för us jo al nix besonners mehr.
Dat kannst jo ok noch mit normaalt Tüüch maken. Aver Kricket, dor wunnerst di doch, wenn denn opmal so`n Hopen wittgekleete Mannslüe op een kortmeihten Rasen stahn sühst, de sick mit`n Ball vergnöögt
Wi weern froh, dat wi annern Dag unner us bleven. Dat is aver nich so, dat dor denn garnix passeert. Wat meent ji woll, wat wi maakt hefft? Woller ne Kathedrale ankeken. Dütmol in Exeter. Wat seggt wi doch ümmer – dreemol is Ollnborger Recht.
Ok düsse Kathedrale is in`n gotischen Stil boot woorn, um 1369 weern se dormit kloor.
Wenn du di dor binnen umkickst, denn sühst du grote, wunnerbor schöne, bunte Glasfenster ut dat 14. Johrhunnert, un över di dat längste, gotische Gewölbe von de ganze Welt. In düssen Dom harr ik mol dat seltene Glück, wat in dütsche Spraak över de Kathedrale to erfohrn.
Man kunn den Indruck kriegen, dat de Englänner op dütsche Touristen gor kien Wert leggen deen, denn Informationen in düütsch hefft wi man selten funnen.
Wi sünd an de engelsche Riviera lang föhrt, in Torquay (Torky) utstegen un harrn dor Tiet, us umtokieken. Torquay is de Heimatstadt von Agatha Cristie, dat is de, de so intressante Krimis schreven hett, so intressant, dat so dor`n Hopen Filme von maakt hefft. Ande moiè Promenad weern luter Verkoopsstäen, wor wi no Hartenslust inkopen kunnen.
Erich is mit us veel över Land föhrt. Dor sünd wi dör de Gegend kamen, wor se de Rosamunde Pilcher Filme dreiht. Dat süht dor jüst so ut, as wi dat in de Filme seht.
Wenn ik nu so trüchdenk, denn weet ik, dat use Reis no Cornwall eene ganz besonnere weer. Wi hefft eene Landschop kennenlehrt, de dat sonst op de Welt woll nich gifft. Wi köönt us `n Bild von England maken, tominnst so`n beten. Dat se mit Europa so nix to doon hebben willt, kann man so`n beten verstahn, wenn man bedenkt, dat se fröher jo al mol de Weltherrschaft beseten hefft.